Bókanir á reiðhöll Sleipnis eru góðar og er það vel. Æskulýðsnefnd hefur fasta tíma fyrir sitt starf enda er æskulýðsstarf félagsins forsenda fyrir stuðningi sveitarfélaganna við félagið og erum við stolt af þeirri grósku og nýliðun sem er í gangi hjá æskulýðsnefnd félagsins.
Í fyrra komu fram fjölmargar kvartanir frá félagsmönnum um að reiðhöllin væri upptekin fyrir námskeið fræðslunefndar á sama tíma og flestir félagsmenn vildu nýta höllina eftir vinnu eða milli kl. 16 og 20. Stjórnin brást við með því að ræða við nefndir um að hafa miðviku til föstudaga lausa á þessum tíma og bóka sína tíma eftir kl. 20 þessa daga eða um helgar.
Fræðslunefnd vinnur nú að dagskrá og stefnir á að nýta þá tíma sem lausir eru en hefur reynst erfitt að fá reiðkennara til að vinna um helgar þegar höllin er að mestu laus. Við vonum að þeim takist að fá kennara og ýta námskeiðum úr vör sem fyrst enda öflug nefnd sem við berum traust til.
Ég vil minna þá félagsmenn sem ekki vita, á að allt starf hjá Sleipni er unnið í sjálfboðavinnu og alltaf þörf fyrir vinnufúsar hendur í nefndastörf og beini því til þeirra sem tjá sig á spjallþráðum alnetsins að gæta orða sinna og koma frekar sinni óánægju farveg með því að taka þátt í nefndastarfi.
