Íslandsmóti barna og unglinga 2020 lauk fyrir stundu og er okkur efst í huga þakklæti til þeirra sem lögðu hönd á plóginn við að gera mótið svona vel heppnað.
Íslandsmótsnefnd vann frábært starf við undirbúninginn frá því ákveðið var að halda mótið eftir COVID-19 innrásina.
Æskulýðsnefnd vann með íslandsmótsnefnd að skipulagningu og sá um að dómarar og starfsfólk mótsins fengju mat og kaffi ásamt því að reka sjoppuna og hjálpa til við það sem til féll.
Fjölmörg börn og unglingar tóku þátt í undirbúningi og verkefnum á mótinu. Vallanefnd sá um að halda völlunum góðum og umhverfisnefnd vann að ýmsum umbótum á yfirbragði svæðisins.
Félagsmenn innan og utan nefnda hafa lagt hönd á plóginn, lánað vélar og hesthús, gefið hey, tekið þátt í markaðsstarfi mótsins og ýmsum störfum öðrum.
Þulir, dómarar og ritarar stóðu sig með prýði og var dagskrá vel fylgt.
Við viljum þakka ykkur öllum fyrir mikilvægt framlag. Mótahaldið skilar fjármunum inní í félagið sem gera okkur kleift að gera enn betur, bæta aðstöðu félagsmanna og gera svæðið vinsælt til mótahalds.
Kveðja frá stjórn Sleipnis
